مميز - قصة نبي الله نوح عليه السلام

قصة النبي نوح عليه السلام

النبي نوح عليه السلام كان هو اول نبي ربنا يبعته للناس في الارض ، و ربنا ارسل نوح لقومه بعد لما انتشرت الضلالات فيهم ، وفيه اعتقاد بيقول ان قوم النبي نوح عليه السلام كان اسمهم ( بنو راسب ) ، و الحكاية ابتدت لما قوم نوح بنوا تماثيل و اصنام لناس قبلهم عشان يخلدوا ذكراهم و لكن مع الوقت بدأ الناس يعبدوا الاصنام دي من دون الله عز وجل ، وهنا قال الله في كتابه : ( وَقَالُوا لَا تَذَرُنَّ آلِهَتَكُمْ وَلَا تَذَرُنَّ وَدًّا وَلَا سُوَاعًا وَلَا يَغُوثَ وَيَعُوقَ وَنَسْرًا ) ، وعشان كدة ربنا ارسل نبيه نوح عليه السلام عشان يهديهم ، و زيه زي كل الانبياء اللي جم على مدار التاريخ بدأ النبي نوح عليه السلام يدعو الناس لعبادة ربنا وحده لا شريك له واستعمل كل الوسائل الممكنة عشان يخليهم يبطلوا عبادة الاصنام و التماثيل ، و كان بيفكرهم ديما بثواب طاعة الله عز وجل : ( يَغْفِرْ لَكُم مِّن ذُنُوبِكُمْ ).

و لكن قوم نوح مستجبوش لدعوته و هنا وصف نوح عليه السلام حاله في الآية الكريم : ( قَالَ رَبِّ إِنِّي دَعَوْتُ قَوْمِي لَيْلًا وَنَهَارًا* فَلَمْ يَزِدْهُمْ دُعَائِي إِلَّا فِرَارًا*وَإِنِّي كُلَّمَا دَعَوْتُهُمْ لِتَغْفِرَ لَهُمْ جَعَلُوا أَصَابِعَهُمْ فِي آذَانِهِمْ وَاسْتَغْشَوْا ثِيَابَهُمْ وَأَصَرُّوا وَاسْتَكْبَرُوا اسْتِكْبَارًا ) ، و بالرغم من الوعود الجميلة الي قالها نبي الله نوح لقومه ان ربنا هيرزقهم رزق واسع وان الاراضي بتاعتهم هتكون جنان بس برضو اتواجه بالكذب ، و بعد كدة بدأ نوح عليه السلام يفكر قومه ازاي ربنا خلق الانسان وان الانسان كان مجرد نطفة صغيرة و ابتدت تتحول بعد كدة لحد ما بقت عضم ولحم بس برضو الحال متغيرش ، و لما يأس نوح من قومه دعا ربنا على لسانه في الآية الكريم : ( وَقَدْ أَضَلُّوا كَثِيرًا وَلَا تَزِدِ الظَّالِمِينَ إِلَّا ضَلَالًا ) ، وقال كمان : ( وَقَالَ نُوحٌ رَّبِّ لَا تَذَرْ عَلَى الْأَرْضِ مِنَ الْكَافِرِينَ دَيَّارًا * إِنَّكَ إِن تَذَرْهُمْ يُضِلُّوا عِبَادَكَ وَلَا يَلِدُوا إِلَّا فَاجِرًا كَفَّارًا ) ، بمعنى انه ربنا ميسبش اي كافر على الارض دي لان الكفار هيضلوا الناس وهيبعدوهم عن عبادة ربنا.

بعد كدا امر الله نوح عليه السلام انه يبدأ في بناء السفينة و زي كل نبي كانت معجزة نوح هي السفينة اللي بناها ، وهنا بدأ نبي الله نوح عليه السلام و الناس القليلة اللي آمنوا بالله في بناء السفينة ، و فيه اعتقاد بان سفينة نوح عليه السلام اتبنت من الواح خشب ، بسبب الآية الكريمة التي بتقول : ( وَحَمَلْنَاهُ عَلَىٰ ذَاتِ أَلْوَاحٍ وَدُسُرٍ ) ، ورغم بدأ نوح عليه السلام في بناء السفينة برضو قومه مبطلوش تريقة عليه انه بيبني سفينة على اليابسة ، قال الله في كتابه الكريم ( وَيَصْنَعُ الْفُلْكَ وَكُلَّمَا مَرَّ عَلَيْهِ مَلَأٌ مِّن قَوْمِهِ سَخِرُوا مِنْهُ ۚ قَالَ إِن تَسْخَرُوا مِنَّا فَإِنَّا نَسْخَرُ مِنكُمْ كَمَا تَسْخَرُونَ ) ، و لازم مننساش ان زوجة النبي نوح كانت كافرة هي و ابنه ولما بدأ الطوفان حاول النبي نوح عليه السلام انه يخلي ابنه يحيد عن الكفر بس للاسف ابن النبي نوح كان فاكر انه هيقدر يهرب من الطوفان ده وانه هينجو.

قبل بداية الطوفان وهلاك قوم نوح كان ربنا امر نبيه ان ياخد معاه في السفينة دي من كل زوجين حي ذكر وانثى ، وبكدة نكون وصلنا لعقاب قوم نوح عليه السلام وهو الغرق بالطوفان في الدنيا ودخول النار في الآخرة : ( مِّمَّا خَطِيئَاتِهِمْ أُغْرِقُوا فَأُدْخِلُوا نَارًا فَلَمْ يَجِدُوا لَهُم مِّن دُونِ اللَّهِ أَنصَارًا ) ، وبعد ما الطوفان خلص رست السفينة على جبل اسمه ( الجودي ) ، وبكدة نكون وصلنا لنهاية القصة قصة اول نبي ربنا بعته للارض النبي نوح عليه السلام ، ومن اهم العبر المستفادة من القصة دي ان اللي بيخالف اوامر الله ربنا بيعاقبه مرة في الدنيا زي ما حصل مع قوم نوح لما غرقوا في البحر بالطوفان ومرة في الآخرة لما ربنا يعذبهم بالنار.