مميز - الأشعة البيضاء Peace Lily

https://www9.0zz0.com/2022/02/04/15/455721570.png

نبات زنبق السلام او نبات الأشعة البيضاء او نبات السباثيفيليوم (SPATHIPHYLLUM) موطنه الاصلي جنوب امريكا. يتميز النبات باوراقه الكبيرة ذات اللون الاخضر الغامق و ازهاره البيضاء الجميلة. النبات بينمو في الغابات المطيرة تحت الاشجارازهارها بتقعد اسابيع و يمكن شهور; و من اهم مميزاتها ان ناسا حطتها ضمن اهم 10 نباتات لازم تبقي في البيوت زائد انها مهمة جدا لمرابي الحيوانات الأليفة و خصوصا القطط لقدرتها علي امتصاص الأمونيا من الهوا و ده بيساعد علي التخلص من الروائح الكريهة في مكان الصندوق يعني ممكن تحط كذا واحدة في مكان مرتفع بعيد عن متناول القطط مع توفير احتياجات النبات.

قابلت مشاكل مع النبات ده قبل كدة و هي ان القصرية كانت فيها فتحات كبيرة و ده بيخليها تنشف بسرعة زائد ان الباعها ليا كان حطط تربة طينية و مغطيها من فوق بتربة صناعية و ده خلاها تنشف من تحت و من فوق تبان انها لسة مبلولة و دي مشكلة قابلت ناس كتير و ماتت منهم و بطلوا يشتروها; عشان كدة لازم تتأكد من النبات الأنت بتشتريه كويس و اذا جبت واحدة و طلع فيها المشاكل دي حاول تغير اكبر كمية من التربة و تغير القصرية و التزم بالتعليمات مع طريقة الحبل في الري عشان تقلل الصدمة.

الضوء:
ممكن تتربي في الضوء الضعيف بس يفضل لفترة قليلة و لكن بتفضل الضوء الساطع بعيد عن الشمس المباشرة. الضوء الزايد بيخليها تبهت او تصفر او تتحرق. الضوء الاقل من احتياجها بيخليها متنتجش ورد.

الري:
بتحب التربة تكون علي طول مبلولة مش ناشفة او غرقانة مية يعني تروي النبات لما او 1 سم من التربة ينشف و في الشتاء 2 سم. لما تنشف الورق بتاعها بينام و في الحالة دي ممكن تسقيها من تحت و متسبهاش في المية اكتر من 15-30 دقيقة. الري الزايد بيخلي الورق يبقي بني.

التسميد:
سمدها كل شهر مرة. لو تسميد النبات زايد هايخلي الورق اطرافه تتحرق و ممكن بقع بني. التسميد الضعيف هايخليها متنتجش ورد و نموها هايقف.

درجة الحرارة:
بتحب درجة حرارة من 18 ل28 درجة مئوية.

الرطوبة:
الرطوبة العالية مش حاجة اساسية بس لو عايز تخليها مبسوطة اكتر كل فترة بخها بالبخاخة.

التزهير:
كل ما تكون مظبطها اكتر و مديها ضوء ساطع و مبسوطة و بتكبر هاتديك ورد اكتر.

الحشرات:
مع الرعاية الضعيفة ممكن تجذب حشرات و حلولها في صفحة المشاكل العامة و حلها وممكن كنوع من الوقاية تجرب الخلطة الخضرا.

الأمراض:
الرطوبة العالية ممكن تخليها عرضة لبعض الامراض الفطرية و البكتيرية عشان كدة الافضل متخليش الرطوبة عالية علي طول و يعني بأساليب التوافر الرطوبة تكون لفترة مش دايمة.

التربة:
التربة المذكورة علي الموقع ممتازة.

القصرية:
فقط لما تملي القصرية كويس بالجذور تتنقل لنمرة اكبر.

التقليم:
أول ما الورد يموت قصه و ارميه لو في اي ورق اطرافه ناشفة قصه حرف V عشان تحافظ علي شكل الورق قدر الامكان.

التكاثر:
بالتقسم او بالتفصيص وقت تغير القصرية.

مناسبات خاصة:
برا بيستخموها في الجنازات.

نبات تنقية الهواء:
مهم جدا علي حسب وكالة ناسا في التخلص من بعض الغازات السامة بالمنازل.

السمية:
سامة جدا ابعدها عن الاطفال و عن الحيوانات الأليفة علي الرغم من اهمية استخدامها لدي مربين القطط.