بسألك ياوقتي عفيف الحب وش ذنبه

[توت احمر]

حبيبي جاني بخطوه ثقيله تلفت المنظور
رفع راسه ونظراته ملاها الخوف والرهبه

نطقها وقال لي كلمه : حبيبي بالهوى مأجور
انا بأرجوك تنسآنـي وتنسى الحلم وتكبه

صحيح احلامنا آصفى من اللولو على البلور
ولكن وقتنـا قاسي ولا ندري من السبه !

بدأ يبكي وعجزت أخفي دموعي دمعة المقهور
مع أن الدمع في عيني عنيد ونزلته صعبه

يبي يحكي ويشكي لي ولكنه رحل مجبور
عرفت أن القـدر آعلن نهاية حبي وَ حبه !

رحل يسحب بخطواته وتلاشى من عيوني النور
دعيته والتفت يمي وَ صد وسار في دربه

تركني في وطن حزني اقاوم هالقدر والجور
( الا بسألك ياوقتي عفيف الحب وش ذنبه ) ؟

علامك تجرح الوافي وتكشف خافي المستور
و ردّي النفس تصفى له وهو عايش على كذبه !

آشوفك يازمن اغبر لغيري تجبر المكسور
وأنا كلي كسر لكن " عزيز النفس " يا صعبه

ودآعيه يا حبٍ مات وتلاشى قصري المعمور
قصور الحب نبنيها وقسى الأقدار تسكن به